Anija “Libra” e Marinës Ushtarake italiane është nisur drejt Shqipërisë me grupin e parë të emigrantëve, të cilët do të vendosen në kampin e emigrantëve në Gjadër. Sipas burimeve nga media italiane “La Repubblica”, në bord ndodhen 16 emigrantë meshkuj, 10 prej të cilëve janë nga Bangladeshi dhe 6 nga Egjipti, të cilët janë kapur në det të hapur. Anija pritet të mbërrijë në portin e Shëngjinit të mërkurën në mëngjes.

Emigrantët i janë nënshtruar një kontrolli fillestar në bord, për të verifikuar nëse plotësojnë kërkesat e përcaktuara në protokoll, që përfshijnë origjinën nga vende të sigurta dhe të qenit burra. Ndërkohë, gratë, të miturit, personat e torturuar dhe të sëmurët janë dërguar në Lampeduza, ku do të shqyrtohen kërkesat e tyre për azil nga komisionet territoriale.

Çfarë pritet të ndodhë në Shqipëri?

Pasi emigrantët të zbresin nga anija në portin e Shëngjinit, ata do t’i nënshtrohen një kontrolli të dytë më të thelluar përpara se të transferohen në Gjadër, një qendër rreth njëzet kilometra larg. Qendra në Gjadër, e cila përfshin tre struktura, ka kapacitet për 880 persona, por aktualisht janë gati vetëm 400 vende. Ajo përmban gjithashtu një infermieri me 144 vende dhe një burg të vogël me kapacitet për 20 persona.

Emigrantët do t’i nënshtrohen procedurave të përshpejtuara kufitare në këtë qendër, dhe një vendim për azilin e tyre pritet brenda katër javëve. Në rast të refuzimit të kërkesave të tyre, ata do të riatdhesohen. Kreu i qeverisë shqiptare, Edi Rama, në një intervistë për “La Repubblica”, theksoi se ndërtimi dhe menaxhimi i qendrave nuk kanë lidhje me qeverinë shqiptare, duke shtuar se shqetësimet mund të lindin vetëm nëse do të kërkohen nga Italia.