Që nga qershori i vitit 2023, Anis Mehmeti nuk është grumbulluar më me Kombëtaren shqiptare, pavarësisht formës së shkëlqyer që po kalon në Angli me Bristol City.

24-vjeçari u kthye protagonist edhe këtë javë në Championship, duke shënuar një gol dhe dhuruar një asist në fitoren 4-2 ndaj Hull City. Performanca e tij u vlerësua menjëherë në Britani, pasi portali i statistikave “Sofascore” e përfshiu në 11-shen më të mirë të javës, duke i dhënë notën 8.3.

Megjithatë, suksesi i tij në Angli nuk ka mjaftuar për të bindur trajnerin Sylvinho, i cili e ka lënë jashtë planeve të Kombëtares prej dy vitesh, edhe pse Mehmeti është grumbulluar vetëm tre herë më parë.

Fansat kanë filluar të ngrenë pikëpyetje për vendimin e stafit teknik, sidomos në një moment kur mesfusha e Shqipërisë ka nevojë për kreativitet dhe lojtarë në formë.