Gjetjet e anketës europiane për arsimin dhe lidhjet e tij me tregun e punës në Shqipëri tregojnë se një pjesë e konsiderueshme e punonjësve përballet me kushte të vështira pune. Sipas rezultateve, 39% e punonjësve shqiptarë kanë raportuar se kanë ngritur ose mbajtur objekte të rënda pa ndihmën e një makinerie.

Në anën tjetër, 29% e punonjësve pohojnë se punojnë në mjedise me nxehtësi ose temperatura shumë të ftohta, kimikate, ose pjesë të rrezikshme, duke u ngjitur me mesataren e BE-së dhe vendeve të Ballkanit Perëndimor (WB5).

Një fakt interesant është se gati gjysma e punonjësve shqiptarë (46%) përdorin duart si “mjetin” kryesor në punë, duke manipuluar objekte ose duke ngrenë peshë. Kjo shifër është shumë më e lartë krahasuar me mesataren e BE-së, por edhe me vende të tjera të Ballkanit Perëndimor (51%).

Analizat e detajuara tregojnë se ngulitja në punë, përdorimi i duarve për manipulim të objekteve, dhe ngritja e peshave janë më të zakonshme në sektorin bujqësor ose industrial, duke theksuar sfidat që shumë punonjës ballafaqohen në këto fusha.

Më shumë se gjysma e punëtorëve në profesionet që lidhen me punë manuale dhe elementare (përkatësisht 53% dhe 50%) pohuan se ngrenë pesha krahasuar me 30% të atyre në profesione gjysmë të kualifikuara dhe 18% të atyre në profesione të kualifikuara.

Ngritja e objekteve dhe ngarkesave është gjithashtu më e zakonshme tek të anketuarit që punojnë në bujqësi ose industri (50%), ndërsa vetëm 36% të atyre që punojnë në shërbime dhe 22% e të anketuarve nga sektori publik, arsimi apo shëndetësia ngrenë objekte gjatë orarit të punës.

Të anketuarit u pyetën nëse si pjesë e punës së tyre kryesore, kanë përdorur ose kanë punuar me makineri të kompjuterizuar muajin e fundit. Rreth një në pesë (21%) shqiptarë thonë se përdorin makineri të kompjuterizuar, krahasuar me gati katër në dhjetë (39%) në BE, dhe tre në dhjetë (28%) në WB5.