Sipas një anketimi të fundit të realizuar nga Reuters dhe firma e anketimeve Ipsos, zëvendëspresidentja amerikane Kamala Harris po udhëheq me 47% ndaj ish-presidentit Donald Trump, i cili ka mbledhur 42% të mbështetjes. Ky avantazh është zgjeruar pas debatit televiziv, ku shumica e votuesve vlerësuan paraqitjen e Harris si më të fortë.

Anketimi dyditor, i publikuar të enjten, tregon se Harris ka fituar një përqindje të konsiderueshme të votuesve të regjistruar, duke rritur avantazhin e saj nga 4% në anketën e mëparshme të realizuar në periudhën 21-28 gusht.

Në mesin e votuesve që kanë ndjekur debatin e së martës, 53% e tyre vlerësuan Harris si fituese, ndërsa vetëm 24% menduan se Trump pati një performancë më të mirë. Gjithashtu, 52% e të anketuarve shprehën mendimin se Trump nuk ishte në formën e tij më të mirë, ndërsa vetëm 21% ndanë të njëjtin mendim për Harris.