Gjykata e Posaçme për Korrupsionin dhe Krimin e Organizuar (GJKKO) ka lënë në burg Admir Tutaj, duke rrëzuar kërkesën e tij për ndryshim të masës së sigurisë. Tutaj u ekstradua nga Kolumbia para disa ditësh, ndërsa Prokuroria e Posaçme e akuzon atë si pjesë të një grupi kriminal që tentoi të trafikonte armë zjarri drejt Mbretërisë së Bashkuar.

Sipas hetimeve, janë identifikuar edhe pesë persona të tjerë si pjesë e këtij grupi, të cilët siguronin pistoleta, i fshihnin numrat serial dhe më pas, në bashkëpunim me specialistë të fushës së mobilierisë në periferi të Tiranës, i fshehnin armët në produkte druri, kryesisht tavolina.

Informacionet tregojnë se në prill të vitit 2023, Policia e Shtetit organizoi një operacion në Pikën e Kalimit Kufitar në Portin e Durrësit, ku gjatë kontrollit të një automjeti furgon tip “Benz” u gjet dhe u sekuestrua një arsenal armësh që ishte fshehur në një tavolinë druri. Hetimet kanë zbuluar se Tutaj, në bashkëpunim me disa persona të tjerë, kishin siguruar arsenalin e armëve dhe kishin organizuar trafikimin e tyre në Mbretërinë e Bashkuar. Ky rast thekson sfidat që përballet autoriteti shqiptar në luftën kundër krimit të organizuar dhe trafikimit të armëve.