Kompania britanike e teknologjisë Skin Analytics ka marrë miratimin nga organet rregullatore për aplikacionin DERM, një sistem autonom me inteligjencë artificiale që mund të zbulojë kancerin e lëkurës përmes një fotografie të bërë me telefonin inteligjent. Ky aplikacion premton të revolucionarizojë diagnostikimin, duke mundësuar rezultate të menjëhershme me një saktësi prej 98.8%.

Si funksionon DERM?

Aplikacioni kërkon përdorimin e një lenteje speciale që ngjitet në kamerën e telefonit për të marrë imazhe me cilësi të lartë. Inteligjenca artificiale e aplikacionit analizon fotografinë e marrë duke e krahasuar me një bibliotekë të dhënash dhe imazhesh të kancerit të lëkurës, duke ofruar një vlerësim të menjëhershëm.

Neil Daly, themeluesi dhe CEO i Skin Analytics, shpjegon:

“Mund të përdorim një sërë telefonash të ndryshëm inteligjentë për të fotografuar zonën e dyshuar të lëkurës. Kjo teknologji mundëson që shumë pacientë të vizitohen brenda një kohe të shkurtër, duke përfituar nga disponueshmëria e telefonave inteligjentë.”

Një zgjidhje për mungesën e dermatologëve në Europë

Europa përballet me një mungesë të theksuar të mjekëve dermatologë, me rreth 30 specialistë për një milion banorë. Ndërkohë, normat e kancerit të lëkurës në Britani janë rritur me 170% gjatë dekadës së fundit. 11% e pacientëve me raste urgjente duhet të presin më shumë se një muaj për një vizitë mjekësore.

Duke pasur parasysh këtë situatë, aplikacioni DERM është një ndihmë e madhe për pacientët dhe mjekët, pasi mund të përshpejtojë diagnostikimin dhe trajtimin.

Testimi dhe rezultatet e para

Rreth 21 qendra mjekësore në Britani tashmë po përdorin këtë teknologji, duke testuar mbi 135,000 pacientë. Nga këto, më shumë se 13,000 raste të kancerit të lëkurës janë diagnostikuar me sukses.

Aplikacioni është në zhvillim prej 12 vitesh, duke u bazuar në një librari të madhe imazhesh, që përfshin faza të ndryshme të kancerit të lëkurës dhe dëmtime që mund të ngjajnë me këtë sëmundje.

Miratimi nga Rregullatori Evropian për Pajisjet Mjekësore e bën DERM pajisjen e parë autonome me inteligjencë artificiale të autorizuar për zbulimin e kancerit të lëkurës, një hap i rëndësishëm për të ardhmen e teknologjisë mjekësore.