Zbardhen detaje të reja nga ngjarja në Orosh, ku u vetëdorëzuan Julian Çumrraku dhe Arben Uka, dy personat e armatosur që u qëndruan të ngujuar në një banesë të braktisur. Raportohet se Arben Uka, i njohur edhe si Hamza Uka, ka një plagë në këmbë, por ende nuk dihen rrethanat e saktë të plagosjes dhe nuk ka reagim zyrtar nga policia.

Operacioni i nisur në orët e para të mëngjesit nga forcat RENEA dhe Policia e Antiterrorit përqendroi rrethimin te banesa e pabanuar në fshatin Orosh, e cila ishte në pronësi të Mëhill Jakut. Burimet bëjnë me dije se personat e ngujuar prej një muaji u dorëzuan pas disa orësh negociata me familjarët e tyre.

Të dy të dorëzuarit dyshohet të kenë lidhje me organizata terroriste dhe kanë qenë prej kohësh nën monitorim nga strukturat e Antiterrorit. Sipas burimeve, Erzen Uka, një ish-pjesëtar i forcave paqeruajtëse shqiptare në Afganistan, ka pasur më parë problematika ligjore, duke përfshirë dënim trevjeçar për nxitje të urrejtjes fetare dhe dyshime për përgatitje të fëmijëve për t’u bashkuar me organizatën ISIS në vitin 2015, çështje që shkaktoi përplasje në gjykatë me gjyqtarin Bibë Ndreca.

Operacioni mbetet ende aktiv, ndërsa policia po kryen kontrolle për eksploziv dhe municione në banesën e braktisur dhe po verifikon çdo rrezik në zonë përpara përfundimit të plotë të aksionit.