Në kuadër të një operacioni të gjerë kundër grupeve kriminale, të ndërmarrë nga Prokuroria e Posaçme Kundër Korrupsionit dhe Krimit të Organizuar (SPAK) në bashkëpunim me Interpolin, është arrestuar në Itali Arian Tuku. Sipas hetimeve të SPAK, Arian Tuku, 36 vjeç nga Lezha, është i dyshuar për një seri veprash të rënda kriminale.

Tuku është akuzuar për tentativën e vrasjes së Aleks Ndrekës, i njohur ndryshe si “Leksi i Druve”. Atentati ndaj Ndrekës ndodhi pasditen e 1 dhjetorit 2020 në autostradën Lezhë-Laç, ku Ndreka mbeti i plagosur me një plumb në gjoks.

Arian Tuku është gjithashtu dhëndri i Arben Ndokës, ish-deputetit të Partisë Socialiste, i cili është gjithashtu në kërkim nga SPAK për lidhje me krimin e organizuar dhe përplasje të forta me Ndrekën. Përveç kësaj, Tuku akuzohet për sigurimin e kushteve dhe mjeteve për të kryer vrasjen e Durim Bamit. Atentati ndaj Bamit ndodhi në nëntor të 2020, ku ai u qëllua me pesë plumba dhe mbeti i plagosur kushëriri i tij, Ervin Kodra.

Sipas hetimeve të SPAK, Arian Tuku ka trafikuar në Mal të Zi 168 kg kanabis sativa, të cilat janë sekuestruar nga autoritetet malazeze. Në një njoftim zyrtar, SPAK bëri të ditur:

“Nga hetimet e kryera nga Prokuroria e Posaçme kundër Korrupsionit dhe Krimit të Organizuar rezulton se shtetasi Arian Tuku, djali i Zef dhe Veranikës, i datëlindjes 02.02.1988 në Lezhë, më datë 01.12.2020 ka tentuar të vrasë shtetasin Aleks Ndreka. Gjithashtu ky shtetas ka siguruar kushtet dhe mjetet materiale për të kryer vrasjen e shtetasit Durim Bami. Më datë 03.11.2020, ai ka trafikuar në Mal të Zi 168 kg kanabis sativa të cilat janë sekuestruar nga autoritetet malazeze. Veprat e mësipërme janë kryer prej tij në një formë të veçantë bashkëpunimi, atë të një grupi të strukturuar kriminal.”