Ish-prokurori i Durrësit dhe aktualisht deputet i Partisë Demokratike, Arjan Ndoji, dëshmoi sot përpara trupës gjykuese të GJKKO në procesin ndaj Plaurent Dervishajt, i ekstraduar nga Dubai si i pandehur për atentatin e ndodhur më 1 nëntor 2019, ku mbeti i vrarë shoferi i tij, Andi Maloku, dhe u plagosën vetë Ndoji dhe Aleksandër Laho, i njohur ndryshe si Rrumi i Shijakut.

Në dëshminë e tij të detajuar, Ndoji rrëfeu momentin e atentatit dhe rrethanat që çuan deri te ngjarja tronditëse, duke theksuar se ende nuk ka një shpjegim të qartë pse ndodhi.

“Unë nuk kam dijeni kush më ka qëlluar dhe nuk kam pasur problem apo konflikt me asnjë person. Kam pasur vetëm një problem: deklaratat e dy politikanëve në atë kohë,” u shpreh Ndoji.

Si ndodhi atentati sipas Ndojit

Ndoji tha se ditën e ngjarjes kishte qenë në zyrë në Durrës dhe rreth orës 12:30 ishte nisur për drekë në restorantin “Koral”, ku ishte takuar me Aleksandër Lahon (Pëllumb Muharremin) dhe Enver Shabën. Pas drekës, të tre u nisën bashkë me automjetin Mercedes Benz që drejtohej nga Andi Maloku, i cili kishte vetëm një muaj që ishte punësuar si shofer personal i Ndojit.

“Makina ka qenë e dukshme, e parkuar para lokalit. Unë u ula përpara, pas meje Pëllumb Muharremi. Nga ura e Dajlanit u futëm në mbikalim dhe, sapo kaluam karburantin, nisën të shtënat,” tregoi Ndoji.

Ai përshkroi momentin si shumë të shpejtë dhe të dhunshëm, ku të shtënat zgjatën rreth 10 sekonda, ndërsa vetëm në sediljen e tij u gjetën 13 predha.

“Të shtënat vinin nga pas, u qëllua me dy armë, plumbat nuk ishin vetëm në breshëri. Unë nuk pashë asnjë mjet tjetër. Shoferi u plagos rëndë, arriti të telefononte të atin, por më pas ndërroi jetë,” shtoi Ndoji.

“Më intereson arsyeja, jo hakmarrja”

Në dëshminë e tij, Ndoji tha se nuk i njeh personalisht të pandehurit në procesin penal, përfshirë Plaurent Dervishajn dhe Julian Meçen.

“Vetëm një herë e kam parë fizikisht Plaurentin. Më intereson pse ndodhi kjo. Nuk kërkoj hakmarrje, por një përgjigje. Edhe pas 6 vitesh, nuk e kuptoj ende pse ka ndodhur atentati,” u shpreh ai.

Ai mohoi që dosjet e gjetura në makinën e atentatit t’i përkisnin atij, duke sqaruar se ato ishin materiale që i përkisnin një avokati dhe nuk kishin lidhje me veprimtarinë e tij.

Fjalët e fundit të shoferit të ndjerë

Një detaj prekës në dëshminë e Ndojit ishte momenti i fundit i shoferit të tij, Andi Maloku, i cili kishte marrë një plumb në shpinë dhe, pavarësisht gjendjes së rënduar, arriti të telefononte babain para se të humbiste jetën.