Pas fitores 3-0 të Shqipërisë ndaj Andorrës, Armando Broja ishte një nga më të spikaturit, duke asistuar në golin e dytë të shënuar nga Manaj. Në prononcimin e tij pas ndeshjes për “Supersport”, Broja u shpreh i kënaqur për mundësinë që iu dha nga trajneri për të luajtur si titullar, dhe gjithashtu për performancën e ekipit.

“Isha shumë i kënaqur që trajneri më dha një shans si titullar. Ishte një ndeshje e vështirë për ne se Andorra qëndronte në mbrojtje, por ishim shumë të kënaqur që fituam 3-0 dhe morëm tri pikë”, tha Broja.

Ai foli gjithashtu për rolin e tij në fushë: “Manaj është sulmues që i pëlqen të bëjë shumë gola, edhe mua më pëlqen, por mund të luaj edhe në krah, mund të krijoj raste, të jap asiste dhe të shënoj. Kemi një ekip të mirë dhe jemi në një ambient shumë të mirë bashkë”.

Broja është optimist për mundësinë që Shqipëria ka për të kaluar në Kupën e Botës: “E dimë që do të jetë e vështirë, por ne jemi një ekip që mund të arrijmë atë pozicion dhe të shkojmë në Botëror. Duhet të jemi bashkë si ekip dhe të jemi të përqendruar.”

Ai theksoi se do të jetë një sfidë e madhe përballë ekipeve të forta si Serbia, Letonia, dhe Anglia, por që Shqipëria ka potencialin të arrijë kualifikimin.