Sipas një analize të BBC Verify mbi imazhet satelitore, Izraeli ka rrafshuar më shumë se 1,500 ndërtesa në zonat e Gazës që ndodhen nën kontrollin e tij, pas fillimit të armëpushimit me Hamasin më 10 tetor.

Fotot më të fundit, të marra më 8 nëntor, tregojnë lagje të tëra të shkatërruara plotësisht brenda më pak se një muaji, me shenja të prishjeve të qëllimshme. Sipas BBC-së, numri real i ndërtesave të shkatërruara mund të jetë më i lartë, për shkak të mungesës së imazheve në disa zona të bllokuara.

Ekspertë ndërkombëtarë e cilësojnë këtë si shkelje të armëpushimit të ndërmjetësuar nga SHBA, Egjipti, Katari dhe Turqia, ndërsa një zëdhënës i Forcave Mbrojtëse të Izraelit (IDF) tha për BBC Verify se “ushtria po vepron në përputhje me kuadrin e armëpushimit”.

Sipas planit 20-pikësh të paqes të Donald Trump për Gazën, mbi të cilin është ngritur marrëveshja e tetorit, “të gjitha operacionet ushtarake, përfshirë bombardimet ajrore dhe të artilerisë, do të pezullohen”. Trump vetë ka deklaruar se “lufta ka mbaruar”.

BBC Verify përdori algoritme radarike të zbulimit të ndryshimeve për të analizuar imazhe para dhe pas armëpushimit. Rezultatet treguan zona me shenja të qarta shkatërrimi, veçanërisht në lindje të Khan Younis dhe Abasan al-Kabira, ku ndërtesat dukeshin të paprekura përpara 10 tetorit.

Në pamjet e vjetra dallohen shtëpi me kopshte, pemë dhe pemishte të vogla, të cilat tani janë zhdukur plotësisht.

Megjithëse marrëveshja e tetorit parashikonte që Izraeli të tërhiqte forcat përtej “Vijës së Verdhë”, IDF argumenton se operacionet aktuale janë pjesë e “çmontimit të infrastrukturës terroriste” të Hamasit.

Në 18 tetor, ministri izraelit i Mbrojtjes Israel Katz deklaroi se “demilitarizimi i Gazës dhe shkatërrimi i tuneleve të terrorit” mbeten pjesë thelbësore e strategjisë së sigurisë kombëtare të Izraelit.