Konspiracionisti dhe teoricieni i njohur, Alfred Cako, ka komentuar zhvillimet e fundit brenda Partisë Socialiste, duke folur për atë që e quan “luftë për trashëgiminë” mes figurave të larta të forcës në pushtet.

Në një intervistë televizive, Cako u ndal te hetimet ndaj zëvendëskryeministres Belinda Balluku, rikthimi në detyrë i kryebashkiakut Erion Veliajt pas vendimit të Gjykatës Kushtetuese, dhe përplasjet e brendshme që, sipas tij, po trondisin partinë e kryeministrit Edi Rama.

“Vazhdon lufta për trashëgiminë e PS-së. Është në aksion Deep State-i, Sorosianët dhe vetë Partia Socialiste, të cilët mund të kenë marrë që të vendoset dikush si pasardhës i Ramës”, – u shpreh Cako.

Sipas tij, vendimi i Gjykatës Kushtetuese, që Rama e paraqiti si fitore të drejtësisë së pavarur, në fakt i jep “frymëmarrje” PS-së në Tiranë, pas krizës së krijuar nga përjashtimi i përkohshëm i Veliajt.
Cako pretendon se pas këtij zhvillimi, PS kishte dalë në sondazhe me Ogerta Manastirliun “në rënie të lirë”, duke e cilësuar këtë si arsye për rikthimin e menjëhershëm të Veliajt në garë.

“Rënia e Tiranës është paralajmërim për rënien e përgjithshme të PS-së në të gjithë Shqipërinë. Pas thirrjes së Ballukut njerëzit po kuptojnë se ka dardhaxhinj, por edhe Kryedardhar — dhe ai është vetë kryeministri”, – shtoi ai me tone ironike.

Cako theksoi se sondazhet e brendshme të socialistëve kanë treguar humbje të mundshme në Tiranë, gjë që sipas tij, ka alarmuar strukturat e PS-së dhe ka nxitur reagime të brendshme për lidershipin e ardhshëm të partisë.