Policia ka konfirmuar ditën e djeshme arrestimin e Fabio Ballabanit, një prej personave më të kërkuar nga SPAK, i cili ishte në kërkim në kuadër të operacionit të ndërmarrë nga prokuroria kundër 7 grupeve kriminale. Pak ditë më parë u përfol për ndalimin e tij, por policia e konfirmoi përmes një njoftimi për mediat se Ballabani është arrestuar në Gjermani dhe pritet të ekstradohet drejt Shqipërisë.

“Vijojnë operacionet e njëpasnjëshme me partnerët dhe agjencitë e zbatimit të ligjit brenda dhe jashtë vendit për kapjen e personave të shpallur në kërkim ndërkombëtar. Finalizohen në bashkëpunim me partnerët gjermanë dy operacione të koduara ‘Para drejtësisë’. Operacionet u realizuan falë sigurimit të informacionit nga Policia e Shtetit dhe shkëmbimit në kohë me Interpol Wiesbaden/Gjermani, nëpërmjet Interpol Tiranës,” njoftoi policia. Në kuadër të këtyre operacioneve, është arrestuar në Gjermani shtetasi F. B., alias F. Z., 37 vjeç, lindur në Vlorë.

Ballabani ishte shpallur në kërkim ndërkombëtar pasi Gjykata e Posaçme Kundër Korrupsionit dhe Krimit të Organizuar në Tiranë kishte vendosur masën e sigurisë “Arrest në burg” për veprat penale “Goditjet ndaj pjesëtarëve të familjes së personit që kryen një detyrë shtetërore,” e kryer në bashkëpunim në formën e grupit të strukturuar kriminal, “Grup i Strukturuar Kriminal,” dhe “Kryerja e veprave penale nga Grupi i strukturuar kriminal dhe Organizata kriminale.”

Fabio Ballabani rezulton të jetë anëtar i bandës së drejtuar nga Emiljano Shullazi. Ai ishte shpallur në kërkim nga Prokuroria e Posaçme Kundër Korrupsionit dhe Krimit të Organizuar për përfshirjen e tij në një ngjarje të ndodhur në vitin 2019, ku bashkëshorti i gjyqtares Saida Dollani, Kristaq Prifti, u kërcënua dhe dhunua brutalisht. Me urdhër të Emiljano Shullazit, Ballabani, i njohur edhe me emrat Fabio Zyberaj dhe Ivi Zyberaj, kërcënoi Priftin.

Në atë kohë, Kristaq Prifti ndodhej në një lokal pranë banesës së tij, së bashku me shokun e tij, Behar Qosen. Në një moment, pasi doli jashtë për të pirë një cigare dhe për të përshëndetur bashkëshorten, i është afruar Fabio Ballabani, i cili në atë kohë ishte i paidentifikuar. I veshur me të zeza dhe me kapele, Ballabani i vendosi Kristaqit një pistoletë në gojë dhe e kërcënoi me fjalët: “Ti me atë shkë**atën tënde, mos harro se ke dy djemtë në Francë.” Në këtë moment, ndërhyri shoku i Priftit, dhe Ballabani, pasi çoi në vend kërcënimin, u largua menjëherë nga vendngjarja me një automjet të bardhë që e priste diku afër.

Grupi i Emiljano Shullazit kishte kërkuar vazhdimisht, plot 12 herë, që gjyqtarja Dollani të tërhiqej nga shqyrtimi i dosjes së tyre, por ajo nuk kishte pranuar, duke vendosur t’i shkojë deri në fund procesit gjyqësor. Sipas SPAK, Emiljano Shullazi kishte rolin e porositësit të dhunës, ndërsa zbatues të urdhrit ishin Fabio Zyberaj (Ballabani) dhe një person tjetër i paidentifikuar.