Pak ditë më parë, më 31 gusht, Guardia di Finanza arrestoi një emigrant shqiptar rezident në Breshia, duke zbuluar në makinën e tij 1,6 kilogramë kokainë me një vlerë tregu mbi 50 mijë euro. Autoritetet italiane kanë publikuar detaje të aksionit dhe pamje nga momenti i arrestimit, duke zbuluar se i dyshuari kishte përdorur metoda të sofistikuara për të fshehur drogën dhe për të shmangur zbulimin nga policia.

Emigranti shqiptar kishte ndërmarrë masa të pazakonta për të çorientuar qentë antidrogë të policisë, duke spërkatur makinën e tij të markës “Golf” nga brenda me parfum. Megjithatë, ajo që i befasoi më shumë oficerët ishte një dhomë e fshehtë e ndërtuar në pjesën e bagazhit të automjetit. Nervozizmi i shqiptarit gjatë kontrollit të policisë e shtyu Guardia di Finanza-n të këmbëngulë në kërkimin e mëtejshëm, në operacionin që u kodua “Twenty”.

Zbulimi i drogës nuk ishte i lehtë, por këmbëngulja e qenit antidrogë çoi në zbulimin e një çelësi të vogël të fshehur në një vrimë poshtë tapicerisë së makinës. Ky çelës aktivizonte një mekanizëm që hapte dhomën e fshehtë, ku ndodheshin dy blloqet e kokainës të mbështjella me natriban të kuq dhe të bardhë. Ky zbulim ishte i mjaftueshëm për të çuar në prangosjen e shqiptarit, i cili u nxor para gjykatës dhe aktualisht ndodhet i izoluar në paraburgim.

I dyshuari kishte jetuar për shumë vite në provincën e Breshias, duke ndërtuar një jetë që në pamje të parë mund të dukej e zakonshme. Megjithatë, ky aksion tregon se ai ishte përfshirë në aktivitete kriminale të trafikut të drogës. Policia italiane, ndërkohë, ka nisur hetimet për të zbuluar rrjetin e mundshëm të bashkëpunëtorëve të tij, duke zgjeruar hetimin për të identifikuar dhe arrestuar të tjerë të përfshirë në këtë rrjet kriminal.