Prokuroria Themelore e Prishtinës ka njoftuar se janë arrestuar të gjithë pjesëtarët e grupit famëkeq ‘Albkings’, i cili funksiononte në rrjetin social Telegram dhe shpërndante foto intime të personave të ndryshëm, me qëllim shqetësimin dhe ngacmimin seksual.

Kryeprokurori i Prokurorisë Themelore, Zejnullah Gashi, në një konferencë për media, teksa njoftoi arrestimin e 7 personave, pjesë e grupit përgjegjës për veprat penale të vjedhjes së identitetit dhe publikimit të kredencialeve, tha se ka gjasa që të zgjerohen hetimet edhe sa i përket personave që do të ndiqen edhe për veprat penale të mëtejshme.

“Ju njoftoj se prokuroria, në bashkëpunim me Policinë e Kosovës, ka arritur me sukses të gjurmonte, zbulonte dhe të arrestonte të gjithë kryesit e veprave penale të vjedhjes së identitetit dhe kredencialeve. Marrë parasysh se jemi duke hetuar ende, kërkojmë që të kurseheni sa i përket pyetjeve, pasi që mund të cenojmë konfidencialitetin dhe integritetin e hetimeve. Ka gjasa që të zgjerohen hetimet edhe sa i përket personave të tjerë,” tha Gashi.

Përveç administratorit të parë, është arrestuar edhe administratorja femër e grupit. Prokurorja e rastit, Erza Bajrami-Kastrati, bëri me dije se grupi është mbyllur përfundimisht.

“Kemi arritur që këtë grup ta mbyllim përfundimisht. Kemi arritur t’i arrestonim shtatë persona që dyshohet se janë përfshirë në këtë rast,” ka thënë ajo.

Grupi “Albkings” në rrjetin “Telegram” brenda një kohe të shkurtër u kthye në një tmerr për gratë dhe vajzat, jo vetëm në Kosovë, por edhe në Shqipëri, teksa aty shpërndaheshin foto dhe video intime të tyre, përfshirë dhe numra celulari. Për grupe të tilla, hetime po kryhen edhe në Tiranë nga Krimi Kibernetik.