Sot, janë identifikuar dhe arrestuar dy autorët e dyshuar të vjedhjes së një marketi në Tiranë. Bëhet fjalë për 21-vjeçarin me inicialet R. S. dhe 36-vjeçarin A. P., të cilët akuzohen se në datën 21 tetor 2024, kanë vjedhur 1.5 milionë lekë nga kasaforta e një marketi në Rrugën e Dibrës.

Gjatë operacionit të koduar “Kasaforta,” policia ka sekuestruar një armë zjarri pistoletë me krehër dhe municion luftarak, e cila u gjet në banesën e njërit prej të arrestuarve. 21-vjeçari R. S. akuzohet për veprat “Vjedhja” me pasoja të rënda, kryer në bashkëpunim, si dhe “Mbajtja pa leje dhe prodhimi i armëve, armëve shpërthyese dhe i municionit.” Ndërsa 36-vjeçari A. P. akuzohet vetëm për “Vjedhjen” me pasoja të rënda, kryer në bashkëpunim.

Njoftimi i Policisë:

Sipas njoftimit të Policisë, shërbimet e Komisariatit të Policisë Nr. 4 kanë qenë të angazhuara për goditjen e veprimtarive kriminale. “Zbardhet dhe dokumentohet me prova ligjore, vjedhja e një shume parash në kasafortën e një marketi në Rrugën e Dibrës. Identifikohen dhe arrestohen dy autorët e dyshuar të vjedhjes. Sekuestrohet një armë zjarri pistoletë, si dhe një pjesë e parave të dyshuara të vjedhura dhe veshjet e përdorura nga autorët gjatë vjedhjes,” thuhet në njoftim.

Specialistët e Hetimit të Krimeve në Policinë Nr. 4, në vijim të punës për të ndëshkuar paligjshmërinë në fushën e vjedhjeve të pronës, pas kallëzimit nga një qytetar, kanë organizuar menjëherë punën për identifikimin dhe kapjen e autorëve.

Materialet e çështjes i janë kaluar Prokurorisë për veprime të mëtejshme.