Policia e Gjirokastrës ka arrestuar dy persona, një grua dhe një 38-vjeçar, të akuzuar për marrjen peng të një 53-vjeçari me qëllim përfitimin e një shume parash.Të arrestuarit janë L. Ç, 45 vjeçe, banuese në Gjirokastër, dhe E. T., 38 vjeç, banues në Krahës, Memaliaj.

Ata përballen me akuzat për veprat penale “Heqja e paligjshme e lirisë” dhe “Shtrëngimi me anë të kanosjes ose dhunës për dhënie pasurie”, të kryera në bashkëpunim. Sipas policisë, L. Ç dhe E. T, në bashkëpunim me njëri-tjetrin, i hoqën lirinë shtetasit P.S., 53 vjeç, dhe e kanosën atë për t’i marrë një shumë parash.

Hetimet kanë treguar se për motive të dobëta, të arrestuarit mbajtën peng në banesën e marrë me qira nga 45-vjeçarja, shtetasin P.S., duke i hequr lirinë dhe duke e kanosur për dhënie pasurie. Materialet procedurale tani i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm në Gjirokastër për veprime të mëtejshme.