Gëzim Latja, 41 vjeç dhe Armando Tarushllari, njohur si Jetnor Cinellari, 52 vjeç, janë arrestuar nga policia e Koçës në bashkëpunim me autoritetet greke si bashkëautorë të vrasjes së një 25-vjeçari shqiptar në Athinë në vitin 2008.

Njoftimi i policisë së Korçës tregon se hetimet e përbashkëta me autoritetet greke çuan në identifikimin dhe ndalimin e dyshimtarëve për vrasjen që ndodhi në vitin 2008. Autoritetet greke kishin arritur të identifikonin vetëm një prej tre autorëve të dyshuar të ngjarjes në atë kohë.

Gëzim Latja, banues në Elbasan dhe Armando Tarushllari, banues në Tiranë, janë ndaluar për veprën penale “Vrasja me dashje”, kryer në bashkëpunim. Autoritetet po vazhdojnë hetimet dhe dokumentimin e plotë të ngjarjes, si dhe procedurat për ekstradimin e tyre drejt shtetit grek.

Materialet procedurale janë dërguar Prokurorisë pranë Gjykatës së Shkallës së Parë të Juridiksionit të Përgjithshëm në Korçë për veprime të mëtejshme.