Tre të burgosur që u arratisën nga burgu i qarkut DeKalb, në lindje të Atlantës, janë arrestuar në Florida, konfirmuan autoritetet amerikane. Lajmi u bë i ditur nga Eric Heinze, ndihmës kryeinspektor në Task Forcën Rajonale Juglindore për të Arratisurit të Shërbimit të Marshallëve të SHBA-së, i cili nuk dha detaje të mëtejshme përpara një konference për shtyp të planifikuar më vonë në Atlanta.

Arratisja u zbulua herët të hënën gjatë një kontrolli rutinë sigurie në burg. Autoritetet nuk kanë sqaruar ende mënyrën se si të burgosurit arritën të largoheshin nga ambientet e sigurisë.

Të arrestuarit janë të moshës nga 24 deri në 31 vjeç. Më i riu përballet me akuza për vrasje dhe grabitje të armatosur, ndërsa dy të tjerët akuzohen për vepra të rënda penale, përfshirë grabitje të armatosur dhe zjarrvënie.

Pas arratisjes, zyra e sherifit kishte paralajmëruar publikun se tre burrat mund të ishin të armatosur dhe përbënin rrezik të lartë për sigurinë publike. Hetimet për rrethanat e arratisjes vijojnë.