Buzë detit të Jonit në Vlorë, 81 karrige me fjongo të zeza u vendosën për të përkujtuar jetët e burrave, grave dhe fëmijëve që humbën në tragjedinë e Otrantos para 29 vitesh, ndërsa tentonin të nisnin një jetë më të mirë.
Në ceremoninë përkujtimore ishte e pranishme ministrja e Shtetit për Marrëdhëniet me Parlamentin dhe deputetja e qarkut Vlorë, Erjona Ismaili, e cila u përlot gjatë homazheve.
“Falënderoj familjarët që më dhanë mundësinë t’i bashkohem dhimbjes së tyre, në këtë ceremoni përkujtimore për 81 viktimat e Tragjedisë së Otrantos. Kam qenë shumë e vogël atëherë, por besoj se kjo tragjedi ka lënë një shenjë që, sado vite të kalojnë, nuk mund as të zhbëhet dhe as të zbehet. Vetë harresa dhemb më shumë,”- tha ministrja, duke theksuar se kujtesa është mënyra më e mirë për të parandaluar përsëritjen e ngjarjeve të tilla.
