Një kriminel famëkeq nga Maqedonia e Veriut dhe një shtetas shqiptar kanë rënë në prangat e policisë greke, të akuzuar për një sërë veprash penale. Fred Mykaj, 46 vjeç nga Mallakastra, dhe Boban Ristevski, 45 vjeç nga Shkupi, janë akuzuar se, të maskuar, kanë hyrë në banesën e tre të moshuarve të moshës 68, 74 dhe 87 vjeç në Tripoli Arkadhia dhe nën kërcënimin e një arme imituese dhe një thikë, i kanë lidhur dhe u kanë grabitur 19,065 euro dhe bizhuteri me vlerë 500 euro.

Pas disa minutash, e moshuara 68-vjeçare ka arritur të zgjidhet dhe ka njoftuar policinë. Pas mbërritjes në vendngjarje dhe veprimeve të para, ka nisur operacioni dhe ndjekja e autorëve, duke përfunduar me arrestimin e tyre në një pyll. Nga hetimi rezulton se autorët kanë mbërritur në vendngjarje me një automjet tip “Suzuki Celerio” të marrë me qira, të cilës i kishin vendosur targa të denoncuara si të vjedhura në 10 maj 2024 në Tripoli.

Gjatë kontrollit në automjet u gjetën dhe sekuestruan një pistoletë imituese, një kartë identiteti false kroate, një patentë false kroate, katër celularë dhe sende të tjera. Arrestimi i Mykaj dhe Ristevski është rezultat i një hetimi të përpiktë dhe një operacioni të suksesshëm të policisë greke, duke i sjellë përpara drejtësisë për veprat e tyre kriminale.