Policia e Tiranës ka arrestuar Ajdin Ajvazin, 19 vjeç, autorin e dyshuar të plagosjes me thikë të Aron Demirajt, 20 vjeç, ngjarje që ndodhi sot në zonën e “Qytetit Studenti”. Konflikti mes dy të rinjve, të dy studentë, ka ndodhur në ambientet e një lokali në rrugën “Sotir Kolea”.

Sipas njoftimit të policisë, pas një zënke mes tyre, Ajvazi ka goditur me mjet të mprehtë Demirajn, i cili u dërgua menjëherë në spital. Raportohet se 20-vjeçari ndodhet jashtë rrezikut për jetën dhe po merr kujdesin e nevojshëm mjekësor.

Në vendngjarje, ku ende janë të dukshme gjurmët e konfliktit, forcat e rendit po vijojnë hetimet për të sqaruar shkaqet dhe rrethanat e incidentit.

Policia ka bërë me dije se materialet hetimore do të referohen në Prokurorinë e Tiranës për vijimin e procedurave ligjore.