Policia Kufitare në Qafë Thanë ka arrestuar një 25-vjeçar nga Prrenjasi, pasi tentoi të ndihmonte një 20-vjeçar të kalonte kufirin në mënyrë të paligjshme, duke e fshehur në bagazhin e automjetit të tij tip “BMW”. Gjatë kontrollit të automjetit në vijën e dytë të pikës kufitare, u zbulua shtetasi 20-vjeçar, i cili po tentonte të kalonte kufirin jashtë rregullave.

Drejtuesi i automjetit, Marjol Çekrezi, u arrestua për veprën penale “Ndihma për kalim të paligjshëm të kufirit”, ndërsa 20-vjeçari, A. B., u procedua në gjendje të lirë për “Kalim të paligjshëm të kufirit”. Policia sekuestroi automjetin dhe dy telefona celularë. Materialet procedurale u kaluan Prokurorisë së Korçës për veprime të mëtejshme.

Ky operacion është pjesë e masave të intensifikuara të kontrollit nga Shërbimi i Policisë Kufitare, për të parandaluar kalimet e paligjshme dhe për të goditur krimet ndërkufitare.