Policia e Korçës ka vënë në pranga një 33-vjeçar të shpallur në kërkim mbarëkombëtar. Matheos Dërsniku, banues në Korçë, u arrestua nën akuzat për përfshirje në shitjen e lëndëve narkotike, organizimin e lojërave të paligjshme të fatit dhe mosbindjen ndaj urdhrit të punonjësve të Policisë.

Dërsniku ishte shpallur në kërkim për një incident të ndodhur më 27 shtator 2024, kur ai nuk iu bind urdhrit të Policisë për të ndaluar automjetin dhe u largua me shpejtësi. Pas këtij incidenti, Policia kreu një kontroll në banesën e tij me vendim të Gjykatës së Korçës. Gjatë këtij kontrolli u gjetën dhjetëra doza të dyshuara të kokainës dhe një peshore elektronike, të cilat përdoren për ndarjen e lëndëve narkotike.

Hetimet gjithashtu treguan se Dërsniku po ushtronte veprimtarinë e paligjshme të lojërave të fatit, duke përdorur celularin për të organizuar këto lojëra. Të gjitha materialet procedurale i janë dorëzuar Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.

Arrestimi u realizua si pjesë e operacionit “Sundimi i ligjit”, i cili ka për qëllim luftën kundër veprimtarive të paligjshme në rajon.