Armiol Rrasa, një 39-vjeçar nga Divjaka i njohur me nofkën “Ari,” u arrestua të premten në Athinë bashkë me partneren e tij, pasi iu gjetën të fshehura në makinë një pistoletë dhe dy kallëpe tritoli. Rrasa, i cili është arrestuar 12 herë më parë në Greqi, ka ngritur debate në mediat greke për faktin se si ka mundur të lirohet shpeshherë në kohë rekord pas arrestimeve.

Sipas grupit hetimor, dyshohet se Rrasa mund të jetë i lidhur me grupe kriminale gjobvënëse, të cilat janë përgjegjëse për sulme dhe shpërthime në biznese të ndryshme në Greqi. Armët dhe eksplozivi iu gjetën të fshehura në një vend të improvizuar në automjet, ndërsa ai udhëtonte me 33-vjeçaren Daniel Luari në një fuoristradë “Volkswagen” të marrë me leasing.

Precedentët penalë të Armiol Rrasës:

– 09.04.2003 – Arrestuar për tentativë vjedhje dhe shkelje të ligjit mbi të huajt.
– 04.07.2005 – Arrestuar për shkelje të ligjit mbi të huajt.
– 04.11.2007 – Arrestuar dhe dëbuar.
– 10.11.2008 – Arrestuar për drogë dhe dënuar me burgim të përjetshëm.
– 31.07.2015 – Liruar nga psikiatria e të dënuarve në burgun e Koridhalos me urdhër dëbimi të përjetshëm nga Greqia.
– 23.02.2016 – Arrestuar për shkelje të kufizimeve të qëndrimit.
– 25.07.2020 – Arrestuar si i kërkuar me dënim për vjedhje.
– 17.01.2021 – Arrestuar si i kërkuar me dënim për falsifikim.
– 31.07.2021 – Arrestuar për shkelje të kufizimeve të qëndrimit.
– 25.11.2021 – Arrestuar për mbajtje të paautorizuar të armëve (iu gjet një thikë e palosshme).
– 06.03.2024 – Akuzuar për dhunë në familje.
– 04.06.2024 – Akuzuar për përdhunimin e një të miture.
– 06.07.2024 – Arrestuar për shkelje të rregullave të qarkullimit rrugor.

Rrasa rezulton me precedentë penalë edhe në Shqipëri, çka tregon një histori të gjatë të përfshirjes së tij në aktivitete kriminale. Arrestimi i tij i fundit ka shkaktuar polemika të mëdha, duke vënë në pikëpyetje funksionimin e sistemit të drejtësisë dhe mbikëqyrjen e precedentëve të rrezikshëm.