Një 38-vjeçar, i identifikuar si Krisald Kundraxhi, është arrestuar nga policia në rrugën “Ali Demi” gjatë një operacioni të zhvilluar kundër kriminalitetit të organizuar. Ai dyshohet si anëtar i bandës së njohur të Gjergj Cukalit.

Gjatë ndalimit të automjetit ku udhëtonte Kundraxhi së bashku me pasagjerin J. K., policia kreu kontroll fizik dhe më pas kontroll në banesën e tij. Në pronësi të 38-vjeçarit u gjetën një armë zjarri pistoletë, municion luftarak, 304 gramë lëndë narkotike kokainë, rreth 131 tableta ekstazi, 3 peshore elektronike dhe pjesë arme.

Kundraxhi rezulton të jetë arrestuar edhe më parë për të njëjtat vepra penale. Në vitin 2016, ai ishte kapur nga policia e Tiranës bashkë me figura të njohura të kriminalitetit si Gjergj Cukali, Artur Tarja, Muharrem Kallushi, Vjollca Gjoka, Gentian Balliu dhe Armand Gjoka.

Policia vijon punën për dokumentimin dhe goditjen e grupimeve kriminale në vend, ndërsa arrestimi i Kundraxhit shënon një tjetër sukses në këtë drejtim.