Një 48-vjeçar është arrestuar në pikën kufitare të Morinës teksa përpiqej të largohej nga vendi. Ky person ishte shpallur në kërkim lidhur me një tentativë vrasjeje të ndodhur një vit më parë dhe u kap gjatë verifikimeve të Policisë Kufitare.

Sipas njoftimit të policisë, ndaj këtij shtetasi ishte caktuar masa e sigurisë “Arrest me burg” për veprat penale “Vrasja me dashje”, mbetur në tentativë, si dhe “Mbajtja pa leje dhe prodhimi i armëve, armëve shpërthyese dhe i municionit”.

Njoftimi i Policisë

Në njoftimin e Policisë thuhet: “Si rezultat i verifikimeve, koordinimit të punës dhe të informacioneve, me shërbimet e Policisë Kufitare të PKK Morinë, u ndalua një shtetas që po tentonte të dilte nga Shqipëria, ndërkohë që ishte në kërkim si autor i dyshuar i një tentative për vrasje me armë zjarri, të kryer një vit më parë në Durrës.”

Shtetasi i ndaluar, F. K., banues në Durrës, dyshohet se në vitin 2023 ka qëlluar me armë zjarri në drejtim të automjetit të shtetasit F. Sh., pas një konflikti për motive të dobëta. Nga të shtënat, fatmirësisht, nuk pati të lënduar.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.