Një 48-vjeçar është arrestuar nga policia, pasi akuzohet se ka shfrytëzuar titullin e një prokurori të SPAK-ut për të mashtruar qytetarët dhe për të kërkuar para në këmbim të ndihmës në zgjidhjen e çështjeve ligjore. Sipas Prokurorisë së Beratit, shtetasi me iniciale A. M., banues në Tiranë, u shfaq në zyrat e Agjencisë Shtetërore të Kadastrës (ASHK) në Berat, duke pretenduar se ishte prokuror në Prokurorinë e Posaçme Antikorrupsion dhe premtonte të ndërhynte për të zgjidhur çështje të ndryshme për një shumë parash.

Prokuroria ka njoftuar se pas hetimeve të realizuara, u arrit të provohej se A. M. ka përdorur titullin e prokurorit për të mashtruar dhe për të kërkuar para nga qytetarët. Ky individ kishte precedentë kriminalë, pasi kishte qenë i dënuar më parë për vepra të tilla si “Përvetësimi i titullit apo i detyrës shtetërore” dhe “Mashtrimi”. Ai u arrestua në flagrancë nga hetuesit e Prokurorisë së Beratit, ndërsa ndaj tij janë ngritur akuzat për kryerjen e veprave penale “Përvetësimi i titullit apo i detyrës shtetërore” dhe “Mashtrimi”.

Ky rast është një tjetër shembull i abuzimit të pozitatave zyrtare për përfitime personale, duke shfrytëzuar besimin e qytetarëve dhe titujt e lartë zyrtarë për të realizuar qëllime të paligjshme.