Një 56-vjeçar ka rënë në prangat e policisë së Elbasanit pasi në banesën e tij u gjetën municion luftarak dhe armë zjarri. Pas marrjes së kallëzimit nga një grua që ishte dhunuar psikologjikisht nga bashkëshorti i saj 27-vjeçar, Komisariati i Policisë Elbasan, duke u bazuar në informacione se babai i 27-vjeçarit posedonte armë zjarri dhe lëndë plasëse, organizoi dhe finalizoi operacionin policor të koduar “Next”.

Si rezultat, policia kreu kontroll në banesën e babait të tij, shtetasi B. Ç., në fshatin Qerret, njësia administrative Labinot Mal. Gjatë kontrollit, u gjetën dhe sekuestruan një armë zjarri kallashnikov, 6 granata dore, 8 kapsolla detonatore, 16 krehëra dhe 330 fishekë luftarak.

Pas veprimeve procedurale, u arrestua poseduesi i armëve dhe municioneve, shtetasi B. Ç., 56 vjeç. Po ashtu, u nis procedimi penal në gjendje të lirë për shtetasin G. Ç., 29 vjeç, djali i B. Ç., pasi dyshohet se ka ushtruar dhunë psikologjike ndaj bashkëshortes së tij, me të cilën është në proces divorci.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme.