Policia greke ka arrestuar autorin e dyshuar të vrasjes së 41-vjeçarit shqiptar, Altin Arapaj, ngjarje që tronditi zonën e Rafinës. Sipas informacioneve zyrtare, arrestimi u bë në Glyka Nera, ku u gjet dhe u ndalua 49-vjeçari shqiptar Mikel Selimaj, i cili dyshohet se kreu krimin.

Forcat e rendit kontrolluan makinën ku ndodhi ngjarja dhe gjetën gjurmë gjaku dhe një gëzhojë, që janë dëshmi kyçe në hetim. Sipas burimeve nga protothema.gr, ngjarja ndodhi të mërkurën në mëngjes, pasi gruaja e viktimës njoftoi autoritetet dhe tregoi se bashkëshorti i saj i kishte thënë në telefon se ishte qëlluar në fytyrë nga një person i njohur, dhe i kërkoi asaj të përpiqej ta gjente.

Hetimet zbuluan se autori i dyshuar, viktima dhe dy persona të tjerë u takuan të martën në mbrëmje në zonën e Artemidës. Më pas, ata hipën në një makinë që drejtohej nga autori dhe ndaluan për disa minuta në kryqëzimin e rrugëve Pefkon dhe Arionos në Rafinë.

Sipas dëshmive, autorii nxori armën dhe qëlloi Altin Arapajn në faqe, duke e plagosur rëndë. Viktima u largua në këmbë nga vendi i ngjarjes, arriti të kontaktonte gruan e tij për t’i thënë se ishte qëlluar me armë zjarri, por më pas ndërroi jetë.

Policia vijon hetimet për zbardhjen e plotë të ngjarjes dhe motivet që çuan në këtë vrasje tragjike.