Policia e Beratit ka identifikuar dhe arrestuar drejtuesin e automjetit që më 21 mars 2025 përplasi një këmbësore, dhe pas aksidentit u largua nga vendngjarja. Ngjarja ndodhi në rrugën “Antipatrea” dhe kishte si viktimë E. D., 37 vjeçe.

Pas hetimeve dhe veprimeve operacionale të realizuara menjëherë, specialistët e Sektorit të Qarkullimit Rrugor mundën të identifikonin dhe kapnin drejtuesin e mjetit, E. V., 60 vjeç, banues në Berat. Ai akuzohet për “Drejtimi i mjetit në mënyrë të parregullt” dhe “Largimi nga vendi i aksidentit”.

37-vjeçarja, e cila u plagos në aksident, mori ndihmë mjekësore dhe, pas trajtimit, u largua nga spitali pa probleme për jetën.

Materialet hetimore janë referuar në Prokurorinë e Beratit, e cila ka vendosur procedimin në gjendje të lirë për të dyshuarin dhe do të kryejë veprime të mëtejshme hetimore.