Policia e Fierit ka arrestuar një 57-vjeçar të dënuar më parë për vrasje, i cili qarkullonte i armatosur me pistoletë dhe municion luftarak. I ndaluari është Petrit Mërnica, babai i Azgan Mërnicës, i riu që vrau 1 vit e gjysmë më parë punonjësin e Shqiponjave në Fier.

Uniformat blu kishin marrë informacion se një shtetas po lëvizte i armatosur në zonë, dhe menjëherë organizuan operacionin policor të koduar “Pathway”. Gjatë kontrollit në një lokal në fshatin Fermë Çlirim, u kap në flagrancë Petrit Mërnica, të cilit iu gjetën në çantën e dorës një pistoletë dhe dy krëhëra, secili me nga 7 fishekë.

Arma e zjarrit dhe municioni u sekuestruan si prova materiale, ndërsa 57-vjeçari u arrestua për armëmbajtje pa leje.

Sipas njoftimit zyrtar, operacioni u realizua nga shërbimet e Forcës së Posaçme Operacionale, Seksioni për Hetimin e Krimeve kundër Personit dhe Komisariati i Policisë Fier. Materialet i janë referuar Prokurorisë së Fierit për veprime të mëtejshme.