Njësitë speciale të policisë gjermane arrestuan të shtunën, më 1 nëntor, një 22-vjeçar sirian në Berlin, nën dyshimin për planifikimin e një sulmi terrorist me motiv islamist.

Sipas Zyrës së Prokurorit Publik të Berlinit, i riu, i identifikuar si Abdullah R., akuzohet për “përgatitjen e një krimi të rëndë që rrezikon shtetin”.
Megjithëse autoritetet nuk kanë dhënë ende detaje të plota mbi planin, gazeta gjermane “Bild” raporton se objektivi i mundshëm ishte një vend publik në Berlin, dhe se sulmi ishte planifikuar të kryhej në formën e një atentati vetëvrasës (kamikaz).

Gjatë kontrolleve në banesën e të arrestuarit, policia gjeti eksplozivë të blerë në internet dhe materiale propagandistike që tregojnë mbështetjen e tij për grupin terrorist “Shteti Islamik” (ISIS).

22-vjeçari ndodhej në Gjermani që nga viti 2023, ku kishte hyrë me status mbrojtjeje plotësuese. Aktualisht ai ndodhet në paraburgim, ndërsa hetimet vazhdojnë për të zbuluar nëse kishte bashkëpunëtorë apo lidhje me rrjete të tjera terroriste në Evropë.