Policia e Durrësit ka finalizuar operacionin “Seven”, duke arrestuar shtetasin Ervin Balliu, 43 vjeç, banues në fshatin Gosë, Rrogozhinë. Ai ishte i shpallur në kërkim ndërkombëtar dhe i dënuar nga Gjykata e Apelit të Torinos, Itali, me 7 vjet burgim për veprat penale “Organizata kriminale” dhe “Trafikimi i narkotikëve”, sipas Kodit Penal italian.

Kapja e tij u krye me qëllim ekstradimin drejt Italisë, ku do të vuajë dënimin e dhënë nga drejtësia italiane. Interpol Tirana dhe Interpol Roma do të ndjekin procedurat për transferimin e tij në shtetin fqinj.

Ky arrestim është pjesë e përpjekjeve të Policisë Shqiptare për luftën kundër krimit të organizuar dhe bashkëpunimin me autoritetet ndërkombëtare për kapjen e personave të shpallur në kërkim.