Policia shqiptare ka arrestuar në Durrës një 49-vjeçar nga Egjipti, Walid Elabd, i shpallur në kërkim ndërkombëtar nga autoritetet italiane. Arrestimi u krye si rezultat i operacionit policor të koduar “Operacionalja 36”, të zhvilluar nga Drejtoria e Forcës së Posaçme Operacionale, në bashkëpunim me Interpol Tiranën dhe homologët italianë.

Shtetasi Walid Elabd dyshohet se ka krijuar dhe drejtuar një organizatë kriminale për trafikimin e qenieve njerëzore në Itali. Ai është objekt i një urdhri arresti të lëshuar nga Gjykata e Katanias, për veprën penale “Trafikimi i qenieve njerëzore”, kryer në kuadër të një organizate kriminale. Për këtë vepër penale, ligji italian parashikon një dënim maksimal prej 20 vitesh burg.

Autoritetet shqiptare konfirmuan se procedurat për ekstradimin e 49-vjeçarit drejt Italisë janë në proces, në kuadër të bashkëpunimit të vazhdueshëm mes Interpol Tirana dhe Interpol Romës.

Operacioni “Operacionalja 36” është një tjetër sukses në përpjekjet e policisë shqiptare për të luftuar krimin e organizuar ndërkombëtar dhe për të ndihmuar vendet partnere në ndjekjen e autorëve të veprave të rënda penale.