Policia greke ka arrestuar 39-vjeçarin shqiptar Eduard Vushaj, i cili ishte në kërkim ndërkombëtar për ekzekutimin e një dënimi prej 16 vitesh burgim në Shqipëri për vjedhje me armë. Vushaj u dënua nga Gjykata e Shkodrës në vitin 2016 për veprën penale “Vjedhja me armë”, pasi në vitin 2013, së bashku me një tjetër person, ka ndaluar një automjet dhe, duke kanosur me armë dy shtetas, ka vjedhur paratë dhe automjetin, si dhe ka plagosur të dy me thikë.
Operativët e policisë greke, në bashkëpunim me Fast Albania dhe DVP Shkodër, kanë siguruar informacion për vendndodhjen e Vushajt dhe, pas shkëmbimit të këtij informacioni me Interpol Tiranën dhe homologët në Athinë, kanë finalizuar operacionin “Kartela e kuqe”. Ai është arrestuar dhe pritet të ekstradohet në Shqipëri për të vuajtur dënimin.
