Një shqiptar 40-vjeçar, i dënuar me 7.6 vite burgim për grabitje, është arrestuar nga policia italiane vetëm pak orë pas festimeve të ndërrimit të viteve. Ai u ndalua në një hotel në Ponte Arche, ku po festonte me familjen e tij.

Sipas autoriteteve italiane, i arrestuari ishte pjesë e një grupi kriminal prej 4 personash, të cilët, në periudhën 2019-2020, kryen dhjetëra grabitje banesash në provinca të ndryshme të Italisë së Veriut.

Në korrik të vitit 2023, Prokuroria Publike e Aleksandrisë kishte lëshuar një urdhër ndalimi ndërkombëtar për shqiptarin. Pas informacioneve të marra nga policia italiane se personi i kërkuar ndodhej në zonën Val Rendena, forcat policore ndërmorën një aksion të shpejtë dhe e lokalizuan atë në një hotel në Pinzolo.

Pasi krahasuan të dhënat fizike dhe gjurmët e gishtave, autoritetet konfirmuan identitetin e tij dhe e shoqëruan drejt burgut të Trentos, ku do të vuajë dënimin.

Gjatë kontrollit në dhomën e tij të hotelit, policia gjeti gjithashtu rreth 2 gram hashash, të fshehura në një qese plastike në dhomën e gjumit. Për këtë arsye, ndaj tij pritet të ngrihet edhe një akuzë shtesë për posedim të lëndëve narkotike.

Aktualisht, shqiptari ndodhet në paraburgim dhe autoritetet italiane po vijojnë hetimet për përfshirjen e tij në veprimtari të tjera kriminale.