Një operacion i Karabinierëve të Romës ka çuar në shkatërrimin e një prej rrjeteve më të mëdha të trafikut të drogës në kryeqytetin italian, me sekuestrimin e 200 kilogramëve kokainë, me një vlerë tregu prej 16 milionë eurosh.

Në pranga ka rënë një shtetas shqiptar 23-vjeçar (i lindur në vitin 2002), i cili u arrestua në flagrancë teksa mbante me vete një çantë shpine me pako kokaine dhe 30 mijë euro në para të gatshme.

Sjellja e tij e dyshimtë në rrugë tërhoqi vëmendjen e karabinierëve, të cilët vendosën ta ndalonin për kontroll. Gjatë verifikimit, rezultoi se i riu ishte i papunë, ndërsa shuma e madhe e parave dhe sjellja e tij çuan në kontrollin e banesës.

Aty u zbulua një qendër e mirëfilltë logjistike për magazinimin dhe shpërndarjen e drogës. Brenda banesës, policia gjeti 191 pako kokainë, të ndara në 8 çanta të mëdha, me logo të ndryshme — “marka” që identifikonin llojin dhe cilësinë e lëndës narkotike për konsumatorë të ndryshëm.

Po ashtu, u sekuestrua një pistoletë me fishekë, e rezultuar e vjedhur, që përdorej për mbrojtjen e “mallit”, si dhe 30 mijë euro cash.

Hetimet zbuluan se 23-vjeçari kishte modifikuar edhe automjetin e tij, duke krijuar një fshehje të dyfishtë nën dysheme, që hapej përmes një kombinimi çelësash e butonash, për të transportuar drogën pa u kapur në kontrolle.

I arrestuari është dërguar në burgun Rebibbia të Romës dhe po hetohet për trafik ndërkombëtar të lëndëve narkotike, armëmbajtje pa leje dhe pastrim parash.