Një 20-vjeçar shqiptar u arrestua mbrëmjen e djeshme në Milano, nën akuzën e trafikut të drogës së fortë në qytet. Aksioni u zhvillua në zonën e “Porta Venezias”, pak para orës 22:00, kur oficerët në shërbim vunë re të riun duke drejtuar një makinë të vogël, të regjistruar në emër të një kompanie që lëshonte automjete me qira. Makina u ndalua në Palestro, ku policia dyshoi se i riu po priste dikë për të kryer një transaksion të paligjshëm.

Pas disa minutash, një 36-vjeçar italian zbriti nga një pallat aty pranë dhe hyri në makinë, duke dalë sërish pas një kohe të shkurtër. Policia ndërhyri menjëherë dhe e ndaloi për kontroll, ku zbuloi se ai sapo kishte blerë një gram e gjysmë kokainë, për të cilën kishte paguar 70 euro. Pas kësaj, oficerët ndaluan dhe kontrolluan drejtuesin e makinës, duke zbuluar 20 doza me peshë totale 22 gramë kokainë, të fshehura brenda dy prizave elektrike.

Gjatë kontrollit të mëtejshëm në makinë, u gjetën edhe 44 mbështjellëse të tjera me 93 gramë kokainë, të vendosura në një qese në sedilen e pasme. I riu, i njohur si i pastrehë, kishte me vete 830 euro cash, të cilat u sekuestruan si të ardhura nga aktiviteti i paligjshëm. Aktualisht, shqiptari po i nënshtrohet hetimeve për të zbuluar rrjetin kriminal me të cilin bashkëpunonte për furnizimin me drogë.