Tiranë, 5 mars – Një 30-vjeçar nga Presheva, i identifikuar si O. K., është arrestuar në pikën kufitare të Morinës pasi rezultoi i shpallur në kërkim ndërkombëtar nga autoritetet austriake për akuzën e trafikimit të lëndëve narkotike.

Sipas policisë, arrestimi u realizua pas verifikimeve të detajuara dhe intervistimit në vijë të dytë, ku u konfirmua kërkesa e autoriteteve austriake për këtë shtetas. Interpol Tirana ka bashkëpunuar ngushtë me Interpol Vienën për të finalizuar arrestimin dhe për ta ekstraduar atë në Austri për t’u përballur me akuzat e ngritura ndaj tij.

Ky është një rast tjetër i bashkëpunimit ndërkombëtar mes strukturave të rendit dhe i përpjekjeve për të luftuar krimin e organizuar dhe trafikimin ndërkombëtar të drogës.