Gjykata e Apelit në Peruxhia ka urdhëruar arrest shtëpiak për një 55-vjeçar shqiptar, i arrestuar më 17 janar në Ferro di Cavallo, pasi u kap me 1,085 gramë kokainë. Vendimi u mor më 3 shkurt, pas një seance dëgjimore ku mori pjesë avokatja e të dyshuarit, Daniela Paccoi.

Ngjarja ndodhi kur shqiptari u përpoq të largohej nga karabinierët në Via delle Caravelle. Gjatë përpjekjes, ai hodhi nga dritarja e Fiat Panda-s së tij një qese të madhe që përmbante lëndën narkotike, në Via Cristoforo Colombo.

Ai u ndalua më pas pranë supermarketit Eurospin, në një ndjekje që rrezikoi edhe efektivët e policisë. Autoritetet italiane vazhdojnë hetimet mbi rrjetin dhe origjinën e drogës, ndërsa shqiptari do të qëndrojë në arrest shtëpiak deri në përfundimin e procedurave gjyqësore.