Një shtetas shqiptar ka rënë në prangat e policisë gjermane, pasi është kapur duke transportuar një sasi kokaine. Ngjarja ndodhi në Autobahn 40, në kryqëzimin Niederdorf, ku një ekip policor ndërkufitar kontrolloi një makinë pasagjerësh me targa belge.

Gjatë kontrollit të automjetit, efektivët e policisë konstatuan parregullsi nën sediljet e shoferit dhe pasagjerit. Pas një inspektimi të detajuar, ata zbuluan dhe sekuestruan 1.15 kilogramë kokainë, të cilat ishin fshehur me kujdes në automjet.

33-vjeçari shqiptar, i cili kishte në posedim drogën, u arrestua përkohësisht dhe u dërgua në stacionin e policisë federale në Kempen për hetime të mëtejshme. Pas përfundimit të masave të para policore, hetimin e mëtejshëm e mori përsipër hetuesia doganore e Essen, që do të vazhdojë procesin përkatës ndaj të arrestuarit.