Një 45-vjeçar shqiptar është arrestuar nga policia italiane pas një incidenti të rëndë që ndodhi në Novate Milanese, ku ai plagosi rëndë djalin e partneres së tij ukrainase. Sipas raportimeve nga mediat italiane, ngjarja ndodhi pas një debati mes shqiptarit dhe 18-vjeçarit, gjatë të cilit 45-vjeçari qëlloi të riun me plumb në qafë.

I plagosuri është dërguar në spitalin Niguarda në Milano, ku ndodhet në gjendje të rëndë. Policia arrestoi shqiptarin për tentativë vrasje dhe armëmbajtje pa leje. Hetimet paraprake tregojnë se të shtënat ndodhën pak pas orës 03:30 të mëngjesit, por ende nuk dihet nëse në momentin e debatit ka qenë e pranishme edhe nëna e të riut, një 39-vjeçare ukrainase.

Gjatë kontrollit në shtëpinë ku ndodhi ngjarja, policia gjeti një gëzhojë nga arma e përdorur në krim, e cila rezulton e vjedhur në vitin 2013 në Sassuolo. Ky incident ka tronditur komunitetin dhe autoritetet lokale, duke theksuar rrezikun e dhunës në mjedise familjare.