Mbrëmjen e djeshme, një ngjarje e rëndë tronditi Pisa-n në Itali, ku një shqiptar është ekzekutuar me armë zjarri. Sipas mediave italiane, viktima është identifikuar si 37-vjeçari Beni Arshiaj, i cili u qëllua për vdekje në sy të të birit në oborrin e shtëpisë së tij.

Ende nuk dihet motivi i vrasjes, por informacione paraprake sugjerojnë se 37-vjeçari sapo ishte kthyer në shtëpi me furgonin e tij pas orës 21:00, kur dy burra e qëlluan atë në kokë dhe më pas u larguan me vrap. Dëshmitarët fqinje raportuan se panë dy persona duke u larguar me një motoçikletë pas të shtënave, por nuk është e qartë nëse ata janë të lidhur me krimin.

Nga hetimet e deritanishme rezulton se 37-vjeçari ishte një emigrant pa precedentë penalë dhe me skedë të pastër, teksa punonte si murator dhe lëvizte me furgonin e tij të bardhë për punë. Arshiaj ishte baba i dy fëmijëve dhe njihej si një banor i rregullt në zonë dhe jo problematik. Policia tha se po heton të gjitha pistat, teksa ka mbledhur dëshmitë.
Beni Arshiaj ishte i martuar me dy fëmijë të vegjël, njëri prej të cilëve dyshohet se ishte dëshmitar i të shtënave, të cilat ndodhën pikërisht kur babai sapo ishte kthyer në shtëpi dhe kishte parkuar furgonin.

Autoritetet po vazhdojnë hetimet për të zbardhur rrethanat e kësaj vrasjeje dhe për të identifikuar autorët e saj.