Një 42-vjeçare shqiptare është arrestuar nga policia italiane për plagosje të dyfishtë ndaj fqinjëve të saj në Pavia të Italisë.

Sipas mediave italiane, 42-vjeçarja ka shkuar në shtëpinë e fqinjëve të saj mbrëmjen e djeshme, më 23 maj, rreth orës 18:00. Në banesë, ajo ka gjetur një 90-vjeçare dhe vajzën e saj, 62-vjeçare.

Pa asnjë arsye të dukshme, shqiptarja ka nxjerrë një thikë kuzhine dhe ka goditur disa herë nënën dhe bijën në pjesët e sipërme të trupit. Pas kësaj, ajo është fshehur në një oborr të brendshëm të shtëpisë, ende me thikën në dorë. Karabinierët lokalizuan 42-vjeçaren dhe sekuestruan armën e ftohtë si provë materiale.

Nënja dhe bija janë dërguar në spital dhe ndodhen në gjendje kritike për jetën. Gjithashtu, 42-vjeçarja shqiptare është dërguar në spital dhe po mbahet në departamentin e psikiatrisë për hetimet e nevojshme.