Forcat gjermane të sigurisë arrestuan një shtetas libian 28-vjeçar, i cili dyshohet se po planifikonte një sulm terrorist ndaj ambasadës izraelite në Berlin. Arrestimi i tij, sipas gazetës gjermane BILD, u realizua në një qytet pranë kryeqytetit gjerman dhe dyshohet se ai është një mbështetës i grupit terrorist Shteti Islamik. Ky veprim erdhi pas sinjalizimeve nga shërbimet e huaja të inteligjencës.

Sipas prokurorisë federale, i arrestuari kishte planifikuar të hynte në ambasadë dhe të kryente një sulm me armë zjarri. Ambasadori i Izraelit në Berlin, Ron Prosor, e falënderoi policinë gjermane për masat e sigurisë që po ndërmerr për mbrojtjen e ambasadës përmes një mesazhi në platformën e mediave sociale X.

Prosor theksoi se “antisemitizmi mysliman nuk kufizohet në retorikën e urrejtjes, por nxit terrorizmin global,” duke theksuar se personeli i ambasadës është veçanërisht i rrezikuar për shkak të pozita së tij në vijën e parë të diplomacisë.

Ky arrest vjen pas sulmeve të ngjashme që kishin shënjestruar ambasadat izraelite në Kopenhagë dhe Stokholm në fillim të këtij muaji. Pas sulmit të Hamasit ndaj Izraelit më 7 tetor 2023, që shkaktoi një luftë në Gaza, autoritetet gjermane kanë intensifikuar vigjilencën e tyre ndaj kërcënimeve terroriste islamike dhe ringjalljes së antisemitizmit, një trend që po ndodhin edhe në shumë vende të tjera.

Një incident i ngjashëm ndodhi në fillim të shtatorit, kur policia e Mynihut qëlloi për vdekje një të ri austriak me lidhje me islamizmin radikal, pasi ai hapi zjarr në konsullatën izraelite dhe ndaj policisë. Gjithashtu, statistikat e fundit tregojnë se më shumë se 3200 krime të motivuara nga antisemitizmi janë regjistruar në Gjermani gjatë vitit të kaluar, një rritje e dukshme në krahasim me të njëjtën periudhë të vitit të kaluar.