Blerina Bala, kryetarja e komanduar e Bashkisë së Himarës, ka dhënë dorëheqjen nga detyra për arsye personale. Bala mori detyrën pas arrestimit të ish-kryetarit Jorgo Goro për shpërdorim dhe ndërkohë që kryetari i zgjedhur nga gara e 14 majit, Fredi Beleri, ndodhet në burg për blerje votash.
Blerina Bala, e cila më parë ishte nënkryetare e bashkisë, qëndroi në postin e kryetares së komanduar për një periudhë të shkurtër.
Deklarata e Dorëheqjes së Blerina Balës:
Të nderuar banorë të Himarës!
Të nderuar anëtarë të Këshillit Bashkiak Himarë!
Ndjehem e nderuar dhe e privilegjuar që mu dha mundësia të drejtoja Bashkinë Himarë për këtë periudhë aq sa të vështirë dhe të mrekullueshme për mua.
Gjatë kësaj kohe jam përpjekur të punoj me përkushtim dhe e palëkundur, për të ruajtur dhe zgjidhur çështjet që janë paraqitur para meje.
Sidoqoftë për shkaqe personale që kërkojnë kohën dhe vëmendjen time të plotë, me keqardhje ju njoftoj pamundësinë time për të vazhduar detyrën e Kryetares së Bashkisë Himarë që mu besua dhe nga Këshilli Bashkiak Himarë.
Me këtë letër, sot zyrtarisht paraqes dorëheqjen time të parevokueshme nga pozicioni i Kryetares së Bashkisë Himarë.
Dua të shpreh falenderimet dhe mirënjohjen më të thellë stafit të Bashkisë Himarë, Këshillit Bashkiak Himarë dhe çdo banori të Himarës për mbështetjen dhe për vlerat njerëzore që kemi ndarë gjatë kësaj periudhe.
Përulësisht kërkoj të pranoni mirënjohjen time të sinqertë, për bashkëpunimin dhe për çdo gjë që kemi arritur së bashku.
