Komuniteti artistik shqiptar është tronditur nga vdekja e papritur e këngëtarit të njohur Shpat Kasapi, i cili ndërroi jetë në moshën 40-vjeçare, ndërsa ndodhej në Itali. Lajmi ka shkaktuar një valë dhimbjeje dhe ngushëllimesh në rrjetet sociale, ku miq, kolegë dhe fansa kanë ndarë kujtime dhe mesazhe zemërthyese.

Moderatorja Luana Vjollca publikoi një foto të përbashkët me Kasapin, duke shkruar:

“Nuk mund ta besoj. Çfarë lajmi i trishtë! Faleminderit për artin & shpirtin tënd të bukur e pozitiv përherë. U prehsh në paqe, Artist.”

Kantautori Ardit Gjebrea u shpreh:

“Jam i tronditur nga humbja e jetës së Shpat Kasapit! Ngushëllime familjes!”

Reperi Big Basta shtoi:

“Të gjithë kolegët e dimë çfarë djali i mrekullueshëm ke qenë! I sjellshëm dhe me zemër të madhe, kurrë nuk dëgjuam diçka të keqe për ty. U prehsh në paqe, miku im.”

Këngëtarja Fifi reagoi me fjalë zemre:

“Ah more nanush, ma kpute shpirtin ???? Djale fisnik. Të qofte dheu i lehtë e të pushoft shpirti në paqe.”

Vesa Luma, duke kujtuar hitet e tij, tha:

“Si ta dëgjojmë tani këngën më të lumtur shqiptare Shpat… ke lënë një zbrazëti shumë të madhe në zemrat tona, por ke bërë të lumtur miliona shqiptarë me këngët e tua, ato të paktën do të jenë të pavdekshme.”

Reagime të tjera kanë ardhur nga Arian Agushi, Jul Deda, Ledion Liço, Dafina Zeqiri, Ardit Çuni, Eni Koçi dhe Liam Mandiaro, të cilët kanë ndarë dhimbjen e tyre për humbjen e një artisti dhe miku të dashur.

Shpat Kasapi, i lindur më 1 maj 1985 në Tetovë, la një trashëgimi të pasur muzikore dhe një zemër të madhe artistike, duke prekur breza të tërë me talentin dhe energjinë e tij pozitive.

Ngushëllime familjes, miqve dhe të gjithë fansave për këtë humbje të parakohshme.