Një incident i pazakontë ka tërhequr vëmendjen e autoriteteve dhe publikut në Kaliforni, ku një “arush pelushi me lëkurë njeriu” u gjet jashtë një dyqani AMPM në qytetin Victorville, duke shkaktuar alarm për mbetje të mundshme njerëzore.

Ngjarja ndodhi të dielën më 13 korrik, kur Departamenti i Sherifit të Qarkut San Bernardino u njoftua për një objekt të dyshimtë të vendosur pranë një stacioni karburanti në Bear Valley Road. Policia izoloi zonën dhe hetuesit mjeko-ligjorë morën në zotërim arushin, ndërsa hetimi mbetet në vazhdim.

Por sipas raportimeve të NBC Los Angeles dhe KTLA, bëhet fjalë për një vepër arti të realizuar me lateks, e krijuar nga artisti i Karolinës së Jugut Robert Kelly, themelues i “Dark Seed Creations”. Objekti i frikshëm është pjesë e një serie arinjsh të punuar në stil horror, të cilët shiten online për 165 dollarë dhe janë përshkruar si “arushë pelushi me lëkurë njeriu”.

Vetë Kelly, në një deklaratë për PEOPLE dhe ABC7 Eyewitness News, konfirmoi se e kishte dërguar arushin javën e kaluar tek një klient në Victorville, por theksoi se nuk kishte dijeni për qëllimin e blerësit apo se do të përdorej në këtë formë.

“Çdo artist do të marrë meritat për punën e tij, kështu që thashë: ‘Unë e bëra atë’”, tha Kelly.
“Nuk e di nëse djali theu ndonjë ligj apo ishte thjesht një shaka, por duket se acaroi disa njerëz.”

Artisti, i cili specializohet në efekte speciale horror dhe atraksione të frikshme, pranoi me humor se incidenti e kishte vendosur në qendër të vëmendjes:

“Mendoj se do të gënjeja nëse do të thosha që nuk po e shijoj fare. Jam një artist i pavarur… pak publicitet ndonjëherë nuk bën dëm.”

Për momentin, policia nuk ka bërë ndonjë arrestim, por ka njoftuar se hetimi po vazhdon për të sqaruar nëse ka pasur shkelje ligjore.
Ndërkohë, “arushi me pamje makabre” po bëhet viral në rrjet, duke nxitur debat mbi kufijtë mes artit, humorit dhe shqetësimit publik.