Asambleja Komunale e Cetinës ka miratuar një rezolutë ku kërkon dorëheqjen e zyrtarëve më të lartë përgjegjës për sigurinë në Malin e Zi dhe një hetim ndërkombëtar për ngjarjen tragjike të 1 janarit, ku 13 persona humbën jetën.

27 nga 30 përfaqësues votuan pro kërkesave të kryetarit Nikolla Gjurashkoviç, duke përfshirë shkarkimin e zëvendëskryeministrit për sigurinë, Aleksa Beçiç, ministrit të Brendshëm, Danilo Sharanoviç, dhe kreut të policisë, Llazar Shqepanoviç, për përgjegjësi profesionale.

Ngjarja tragjike ndodhi kur Aco Martinoviç vrau 13 persona, përfshirë dy fëmijë, dhe plagosi rëndë tre të tjerë, duke kryer sulme në pesë lokacione të ndryshme brenda gjysmë ore. Operacioni policor për kapjen e tij zgjati më shumë se gjashtë orë, pas së cilës autori kreu vetëvrasje.

Ky është krimi i dytë masiv në Cetinë brenda dy viteve, pas një masakre të ngjashme në gusht të vitit 2022 ku u vranë 10 persona dhe u plagosën gjashtë të tjerë.

Banorët kanë shprehur zemërimin e tyre për mungesën e kualifikimit në polici, fondet e pamjaftueshme dhe dështimin e reformave. Asambleja ka kërkuar që një hetim i pavarur ndërkombëtar të hedhë dritë mbi rastin dhe përgjegjësitë.